Лидерот на коалицијата „Црно-бело“, Дритан Абазовиќ, на денешната средба во манастирот Острог предложил носителот на коалицијата„За иднината на Црна Гора“, Здравко Кривокапиќ, да биде премиер на црногорската влада, но, како што пишува „Вијести“, коалицијата „Демократски фронт“ го одбила тоа.
Како што објавува медиумот, лидерите на ДФ тврдат дека Кривокапиќ веќе ја нема обединетата поддршка од таа коалиција и дека не можат да го поддржат како мандатар додека не ја преиспитаат довербата кон него во партиските тела.
На денешната средба со митрополитот црногорско-приморски Амфилохије, лидерите на политичките партии се обиделе да ги приближат позициите во врска со формирањето на новата влада пред конститутивната седница на Парламентот на Црна Гора.
Според извори на Вијести, тие се обиделе да се договорат за претседателот на Собранието и мандатарот.
Лист наведува дека местото на шефот на парламентот треба да им припадне на демократите.
Било предложено и пратениците од новото мнозинство, нив 41, да потпишат Кривокапиќ да биде мандатарот и да одржи состаноци со сите партии и да формира влада.
Кога на повеќето од учесниците им се чинело дека сè е договорено, еден од лидерите на ДФ изјавил дека Кривокапиќ нема единствена поддршка и дека мора да помине преглед на довербата во коалицијата.
На состанокот било објавено и дека коалицијата „Црно-бело“ или експертите што ги предлагаат се очекува да го контролираат безбедносниот сектор (Министерството за одбрана, полицијата и Агенцијата за национална безбедност) и дека тоа е очекување на меѓународната заедница.
Покрај Амфилохије, на состанокот присуствувале Кривокапиќ, Абазовиќ, епископ Јоаникије, лидерот на Новата српска демократија Андрија Мандиќ, лидерот на Демократската народна партија Милан Кнежевиќ, претседателот на Социјалистичката народна партија Владимир Јоковиќ и демократите Борис Богдановиќ и Момо Копривица.