Не автомобилите, туку роботите ќе бидат главниот фокус на вниманието на Tesla оваа година, според последните изјави на нејзиниот шеф Eлон Маск. Тој им кажа на инвеститорите дека неговите планови за роботи имаат „потенцијал да бидат позначајни од бизнисот со возила со текот на времето“.
Компанијата развива проект за хуманоиден робот наречен Optimus, кој за прв пат беше споделен минатата година, потсетува Би-Би-Си. Tesla Bot, како што беше наречен во јавноста, ќе ги користи истите системи за вештачка интелигенција (ВИ) што ги поткрепуваат електричните возила на Tesla, рече Маск на настанот во август минатата година.
Во линија со ова, новата изјава на Маск за роботиката сигурно ќе привлече внимание. Тој им кажа на инвеститорите дека првата примена на хуманоидниот робот ќе биде во фабрика во Tesla, каде што машината „ќе преместува делови низ фабриката или нешто слично“. Но, во иднина роботот ќе помогне да се реши проблемот со недостигот на работна сила.
Исто така оваа недела, претприемачот напиша на социјалните мрежи: „Вештачката интелигенција на Tesla може да игра улога во создавањето на AGI [целосна вештачка интелигенција], имајќи предвид дека учи од надворешниот свет, особено со доаѓањето на Optimus“.
Концептот на целосна вештачка интелигенција AGI се однесува на способноста на машината да учи или разбира задачи кои моментално ги извршуваат луѓето. Во истата публикација Маск додаде: „Децентрализираната контрола на роботите ќе биде клучна“.
Говорот на шефот на Tesla повторно предизвика порој од коментари и анализи. „АGI е исклучително тешка задача. Идејата дека можете да развиете целокупна вештачка интелигенција затоа што сте создале беспилотно возило е апсурдна“, вели Алан Винфилд, професор по роботика на Универзитетот во Западна Англија. „Дури и ако овој автомобил е многу способен, тој сепак нема да биде AGI – тоа би била тесна [вештачка] интелигенција со високи перформанси“.
Професорот смета дека откако Google и Facebook со години работат на вештачка интелигенција и се потпираат на големи тимови од „некои од најдобрите експерти“ во областа, идејата на Маск да „влезе и да го реши проблемот“ е крајно арогантна.
Други експерти истакнуваат дека идејата за создавање економски ефективни хуманоидни роботи за масовниот пазар досега не покажува знаци на одржливост. Значајно е тоа што во јуни јапонскиот конгломерат Softbank објави прекин на производството на Pepper – пријателскиот мал хуманоид кој стана симбол на роботиката во последните години. Неговото производство ќе продолжи „само кога ќе бидат потребни роботи“.
Сепак, Маск сака тешки проблеми, а има многу успеси кои можат да го отфрлат скептицизмот. Ракетите за повеќекратна употреба на SpaceX се сметаат за голем чекор напред за летот во вселената, на пример. На ова треба да се додадат амбициите на познатиот претприемач да ја насели Месечината, па дури и експедиции на Марс.
Можеби целокупната вештачка интелигенција што компанијата ќе ја развие за овие потфати ќе биде поуспешна од очекуваното. Дотогаш, повеќето експерти од индустријата остануваат скептични.