Директорот на Бирото за јавна безбедност, Митко Чавков, кој беше шеф на оперативниот штаб за обезбедување на парламентот, треба да понесе кривична одговорност, затоа што знаел што се случува, а не дејствувал, смета адвокатот и поранешен судија Валентин Зафиров.
Тој, во емисијата 360 Степени, посочи дека има обид да се изостави одговорноста на оние што ги планирале насилствата во Собранието на 27 април, а да бидат казнети само оние што извршувале задачи.
„Теоретски земено, ако на еден судија – кривичар што држи до морални и правни принципи му се донесе такво обвинение, сите овие од Чавков до пратеници, ќе ги суди дека делото го сториле во договор. Очигледно е договарањето, знаеле што ќе се случи во Парламентот, а Чавков е недостапен за министерсот за внатрешни.“ – изјави Валентин Зафиров, адвокат и поранешен судија
Адвокатката Натали Петровска ја поддржа тезата дека со условните казни за насилниците се испраќа охрабрувачка порака за некој да изврши слични напади во иднина.
„Тоа е директен атак на судот. Ако се сеќавате на протестите пред неколку години кога имаше демонстранти пред судовите за предметот „монструм“, тие фрлаа со предмети на судовите и скршија неколку прозори. Тие луѓе добија кривични осуди и добија ефективни казни затвор. Значи во тој случај се применува правдата на еден начин, а во овој случај поинаку“. – вели Натали Петровска – Адвокат
Гостите во емисијата беа согласни дека насилството во Собранието било добро испланирано и дека пратеници од ВМРО ДПМНЕ ја пуштија толпата да влезе наместо да ја заштитат институцијата./извор АлсатМ