На прашањето дали двајцата претседатели разговарале за промовирање на идејата за заеднички регионален пазар, Иванов рече дека тоа ќе биде во надлежноста на двете Влади.
– Тоа е во интерес на целиот регион. Ние во минатото сме имале заеднички пазар, ги знаеме бенефитите од сето тоа, и која е користа за нашето стопанство, така што се надевам дека владите од регионот, како што Брдо Бриони процесот на ниво претседателите ги промовира тие идеи за зближување и отварање на просторот, така и премиерите на нивната идна средба во Трст сигурно конкретно ќе разговараат за реализација на таа иницијатива, изјави македонскиот претседател.
Според претседателот Иванов, Македонија и Србија како две соседни земји своите односи мора да ги негуваат во духот на пријателството и меѓусебна соработка. На средбата со Вучиќ раазговарале и за можностите за продлабочување на економската и трговската соработка, како и за прашања од културата.
– Разговаравме и за прашања од доменот на културата кои мора да ги регулираме со одбележувања на настани, како што беше одбележувањето на 70-годишнината од доаѓањето на Македонците во Србија што го одбележавме заедно со претходникот на Вучиќ. Тоа беше еден чин на почит. Тие ни посветија внимание и нашите Македонци беа навистина задоволни. Таквите настани ќе продолжиме и во иднина да ги одбележуваме, бидејќи тие ги зближуваат двата народа и придонесуваат кон доверба на двете држави, рече Иванов.
Политичкиот дијалог меѓу двете земји се очекува да продолжи со идна посета на претседателот Вучиќ на Република Македонија.
Иванов оствари и неформална средба со поранешниот српски претседател Томислав Николиќ.