Американскиот апелационен суд привремено го одби барањето на истражните органи на Капитол, кои побараа пристап до документите од Белата куќа на поранешниот американски претседател Доналд Трамп.
Одлуката е донесена два дена откако судот нареди документите да бидат предадени на конгресната комисија задолжена за истрагата, пренесе Би-Би-Си.
Пратениците се обидуваат да откријат дали Трамп знаел дека ќе има немири во кои загинаа пет лица. Неговите поддржувачи упаднаа во зградата на Конгресот на 6 јануари, кога требаше да се потврдат изборните резултати.
Трамп одби да го признае поразот на претседателските избори од Џозеф Бајден, тврдејќи дека имало голема изборна измама.
Истражувањето го спроведува комисија назначена од Претставничкиот дом, во која има мнозинство демократи.
Комисијата сака да види телефонски разговори, записи на посетители и други документи на Белата куќа кои би можеле да дадат повеќе детали за настаните што доведоа до нападот на Конгресот.
Меѓутоа, во четвртокот Апелацискиот суд во Вашингтон привремено ја суспендираше одлуката на понискиот суд да ги достави документите до петок.
Апелациониот суд изјави дека ќе закаже ново рочиште за 30 ноември, а предметот ќе биде доделен на тројца судии кои ќе бидат избрани по случаен избор, јавуваат американските медиуми.
Повеќе од 670 демонстранти беа уапсени по нередите во Капитол.