Европските граѓани ќе можат да ги користат своите мобилни телефони без доплата кога патуваат во странство во ЕУ, пишува Politico.
Европскиот парламент, Европската комисија и Советот на ЕУ се состанаа во средата навечер за да преговараат за продолжување на правилата за роаминг, кои првично беа договорени во 2017 година, но ќе завршат во јуни следната година.
„Роамингот е една од најуспешните мерки на единствениот дигитален пазар“, рече словенечкиот министер за јавна администрација Бошкан Коритник, еден од преговарачите.
„И потрошувачите и бизнисите можат да продолжат да ја уживаат оваа предност“.
Преговарачите се согласија во раните утрински часови во четвртокот да ги прошират правилата и да додадат нови обврски на операторите за да се обезбеди квалитетот и брзината на повиците, текстуалните пораки и употребата на мобилни податоци во странство.
Ревидираната регулатива ја подобрува транспарентноста во однос на услугите што може да подлежат на дополнителни трошоци. Исто така, ги заштитува потрошувачите од шокантни сметки како резултат на ненамерен роаминг за неземни мобилни мрежи на фериботите или авионите.
Европските власти, исто така, воведоа плафон за цените што операторите меѓусебно ги наплаќаат за користење на мрежи во странство, познати како „такси на големо“, кои ќе бидат ограничени на 2 евра по гигабајт од 2022 година и постепено ќе се намалуваат до 1 евро во 2027 година, се вели во соопштението од парламентот.
Европратениците го отфрлија барањето за забрана на дополнителни такси за повици од друга земја-членка на ЕУ до матичната земја. Сепак, преговарачите се согласија дека Европската комисија мора да процени до 2023 година дали таквата забрана ќе биде неопходна.
Новата регулатива ќе стапи на сила на 1 јули 2022 година, продолжувајќи ги правилата до крајот на јуни 2032 година.