Добриот брак не е спој на „совршена двојка“. Тоа е моментот кога несовршениот пар учи да ужива во своите разлики, напиша еднаш хумористичниот писател Дејв Меурер, цитира Стандард лајф. кој ѝ послужи како вовед на Ана К., авторката на блогот на порталот Tinny Buddha, за она што таа самата го научила за бракот во нејзините 11 години брак.
Таа вели дека таа и нејзиниот сопруг немаат совршен брак, но во меѓувреме препознала неколку „кризни точки“ кои треба да се земат во предвид за да се изгради поцврста и постабилна врска и да се одржи заедницата.
Еве единаесет лекции за бракот што таа ги издвои:
1. Отворена и искрена комуникација
Во раните денови од мојот брак, бев ужасна во ситуации кога јас и мојот сопруг моравме да ги изразиме нашите чувства. Наместо да кажам што ме мачи, го потиснав она што го чувствував, надевајќи се дека ќе ми ги прочита мислите. Сепак, со текот на годините научив дека мојот сопруг не чита мисли и ако нешто ме мачи морам да разговарам со него за да сменам нешто. Двете страни мора да бидат подготвени да комуницираат отворено за да успее бракот.
Признајте си еден на друг кога не се согласувате со мислењето на другата страна. Не мора секогаш да правите компромиси или да попуштате, затоа што тоа само ќе направи еден од вас среќен. Наместо тоа, најдете заеднички јазик со тоа што ќе бидете искрени за вашите чувства и ќе ги гледате работите од перспектива на вашиот партнер.
2. Поддржувајте се едни со други
Како пар, отсекогаш сме ги поддржувале соништата еден со друг – големи или мали. Минатата година мојот сопруг мораше да се пресели поради работа. И покрај тоа што не го гледав како нешто што го посакувам во иднина и не бев навистина возбудена поради овој потег, знаев што значи тоа за него. Отсекогаш ми бил огромна поддршка и постојано ме охрабрува да се развивам и професионално и во мојот личен живот. Затоа знаев без сенка на сомнеж дека морам да застанам покрај него и да го направам тој чекор, па го направивме тоа!
Дури и кога е тешко, треба да се поддржуваме еден со друг за да растеме.
3. Извинете се еден на друг
Не сум секогаш најдобра во изговорите, но со текот на годините станувам подобра. Денес сум доволно зрела да кажам „извини“ или „се извинувам за ова и она“. Порано бев премногу горда за да го кажам тоа, па дури и да признаам дека грешам, но со текот на годините научив да се извинувам, наместо да продолжам како и обично без да ја прифатам или да ја признаам аргументацијата.
Кога се извинуваме и велиме дека ни е жал, покажуваме дека ги цениме меѓусебните чувства и дека сме подготвени да ги решиме разликите. Тоа покажува дека сте пар кој прави грешки, но е подготвен да работи на себе додека гради заедница.
4. Поставете граници со роднините
Роднините сакаат да внесат малку „запршка“ во секоја врска. Имавме многу коментари од роднините за тоа кога треба да основаме семејство. Изборот да ги доиме двете наши деца исто така доби многу критики. Последна прилика беше кога сопругот мораше да се пресели во друга земја поради работа, неговите родители му предложија да не го прави тоа. Научивме колку е важно да се постават граници со членовите на семејството, многу рано како двојка, и да бидеме доволно храбри и смели да кажеме: „Благодарам за советот; сепак, ќе ја донесеме одлуката која најмногу одговара на нашето семејство“.
5. Имајте заеднички цели
Јас и мојот сопруг сме тотални спротивности, но верувам дека нашите разлики се надополнуваат. Не сите наши цели се исти. Мојот сопруг има лични цели, како и јас. Но, како двојка, имаме заеднички цели и клучни области за кои се согласуваме. На пример: како ги воспитуваме децата, како вложуваме пари, како поминуваме време заедно, планираме одмори, какви подароци подаруваме и слично.
6. Најдете време еден за друг
Како брачен пар со две мали деца постојано нè прекинуваат во нешто. Ова е доба на животот во која се наоѓаме и едноставно ја прифаќаме. Всушност, ние уживаме да ги вклучуваме нашите деца во речиси сè што правиме, поминувајќи што е можно повеќе време со нив. Меѓутоа, откако децата ќе заспијат, ние поминуваме околу еден час заедно секоја вечер, разговарајќи и уживајќи во меѓусебното друштво пред спиење.
7. Не се осудувајте или критикувајте едни со други
После единаесет години брак, сфатив дека секогаш ќе има нешто што ќе направи што ќе ме нервира. Исто така, некои мои постапки ќе го изнервираат. Тоа е неизбежен дел од бракот. Повеќе не се фрустрирам кога остава валкани пижами или чорапи на креветот откако ќе се пресоблече. Наместо тоа, ги ставам во корпата за перење. Обрнувањето внимание на сите навики на вашиот сопружник и нервирањето поради нив само ќе ве спречи да ги видите неговите бескрајно добри квалитети.
8. Покажете интерес да дознаете повеќе еден за друг
Кога сте со некого долго време, лесно е да се претпостави дека знаете сè за него, но секогаш има повеќе да научите и разберете, а љубопитноста може да ја одржи врската свежа и возбудлива. Иако сме во брак повеќе од една деценија, има уште многу што можам да научам за мојот сопруг и сакам да го научам. Затоа внимателно го слушам за да видам што го лути кога гледа вести или што го интересира кога игра игра, гледа филм или си игра со децата.
9. Не правете ништо „само заради тоа“
Таквиот став никогаш не функционира добро и е прилично нездрав за секоја врска. Се разбира, и двајцата партнери треба да имаат време и способност да ги негуваат своите интереси. Но, ако мислите дека треба да пронајдете нова авантура, како некој вид одмазда за вашиот партнер кој игра голф цело попладне, веројатно негувате лутина.
10. Избегнувајте да се жалите на вашите родители или пријатели
Кавгите во бракот се неизбежни, а несогласувањата можат да бидат здрави. Верувам дека тие даваат можност да научат нешто ново еден за друг. Но, колку повеќе луѓе внесувате во него, толку работите стануваат покомплицирани, бидејќи е примамливо да им дозволите да влијаат на вас наместо да ја донесете одлуката што е соодветна за вашата врска.
Кога сопружниците седат заедно и имаат искрен, отворен, внимателен разговор, тие можат подобро да се разберат.
11. Бидете разиграни и смејте се заедно
За време на моите единаесет години брак, сфатив колку е важно да не зборуваме секогаш за секојдневните активности и работите што се случуваат низ светот. Нашите срца лесно можат да станат тешки кога ќе се фокусираме на сè што се случува во светот.
Како пар, треба да одвоите момент и да се препуштите на лесната, разиграна страна на животот. За нас, тоа значи заедно да гледаме смешни видеа на TikTok или да испраќаме смешни текстуални пораки едни на други. Ова ни овозможува да додадеме радост и да донесеме многу потребна искра во нашите животи.