Западната воена стратегија во однос на руско-украинскиот конфликт не функционира, а мирот во Украина може да се постигне само преку разговори со Русија и САД, изјави денеска унгарскиот премиер Виктор Орбан.
„Западната воена стратегија не функционира, таа не успеа“, рече тој, додавајќи дека шансите за мир во Украина се мали без преговори меѓу Русија и Америка, пренесе ТАСС.
Орбан ја отфрли идејата дека украинската војска може да ја победи Русија, нарекувајќи ја илузија.
Според него, санкциите на ЕУ, кои имаат за цел да ја дестабилизираат Русија, исто така не функционираат.
„Целиот свет не е обединет против Русија“, нагласи Орбан.
Според Орбан, во оваа ситуација потребно е да се работи на нов европски безбедносен систем.
„Не се гаси пожар со фрлач на пламен. Америка мора да игра клучна улога. Западот е со половина срце вклучен во војната, мора да се договори нов европски безбедносен систем, а бидејќи ЕУ нема своја обединета армија, мора да очекуваме стабилност да дојде од руско-американскиот договор“, додаде Орбан.