Криминалистичката служба на покраината Виена покренала истрага за исчезнувањето на двегодишната Данка Илиќ од Србија, која наводно била видена во главниот град на Австрија, потврдиле од полициската управа во Виена за „Kosovo online“.
„Српски државјанин кој живее во Виена, според неговата изјава, можеби видел девојче кое исчезнало во Србија, придружувано од две жени на трамвајска постојка во центарот на градот на 30 март околу 20 часот. Ги контактирал српските власти кои потоа се обратија до виенската полиција со барање за истрага“, се наведува во одговорот.
Виенската полиција го сослушала сведокот и го зела неговото видео за вештачење и понатамошна истрага, кое човекот го снимил. Како што се наведува, за исчезнувањето на детето дознал преку социјалните мрежи.
Видеото веќе беше објавено од српските медиуми, на кое се гледа девојче кое наликува на малата Данка.
„Точните околности, особено дали навистина се работи за исчезнатото девојче, се предмет на истрага што е во тек. Истрагата ја води Криминалистичката служба во Виена“, стои во дописот на Виенската полиција.
Двегодишната Данка Илиќ од Бор исчезна во средата, а оттогаш српската полиција трага по неа.