Советничката група на СДСМ иницира одржување вонредна седница на Советот на Град Скопје за проблемот со ѓубрето и отпадот што во изминатите денови го имаше во изобилство во и околу контејнерите во главниот град. Како што изјави советничката Љубица Јанчева, СДСМ ќе предложи и мерки и активности за итно дејствување на градот.
-Една од мерките, една од решенијата што ќе ги предложи СДСМ заедно со коалициските партнери за решавање на проблемот со ѓубрето е вклучување на сите јавни претпријатија. Со сиот свој човечки потенцијал, а потоа и со онаа механизација со која располагаат јавните претпријатија да се вклучат во чистењето за што поскоро целосно да се расчисти ѓубрето во Скопје и состојбата да се врати во нормала, кажа Јанчева.
Според неа, оваа мерка ќе овозможи ЈП “Комунална хигиена” брзо да се врати во секојдневниот работен тек, а ќе превенира и во иднина да не се случува повторно ваков хаос.
-Очекуваме поддршка од сите советнички групи, вклучително и од мнозинството во Советот од ДПМНЕ. Наместо модерно Скопје како што Мицкоски и ДПМНЕ ветуваа пред скопјани кога бараа гласови од нив, создадоа загаден град и нефункционални јавни претпријатија, истакна советничката и додаде дека советот има механизми што треба да ги искористи во интерес на граѓаните и во интерес на Скопје, и во оваа насока очекуваме одговорност од сите советници.