Поради тоа што пратеникот од редовите на СДСМ, Дарко Каевски е позитивен на коронавирус, а се чекаат резултатите за друг пратеник, мнозинството не беше во можност да обезбеди кворум за иницирање на 30-та седница на која се ставени законот за попис на населението, интерпелацијата против Никола Димитров и низа други закони.
Координаторот на СДСМ, Јован Митрески ја обвини опозицијата дека со денешното неприсуство на седницата покажува недржавничко однесување, особено, како што рече, што на оваа седница, меѓу другите, се измени на Законот за лекови, поврзани со вакцинацијата против КОВИД-19.
-Опозицијата има други интереси, теснопартиски и лични, за да се прикаже државата во лошо светло, поради што трпат институциите и државата, рече Митрески додавајќи дека од овие причини опозицијата го блокирала донесувањето на Деловникот за онлајн седници со цел, како што рече, да може да ја кочи работата на Собранието.
Пратениците од опозицијата, иако присутни во Собранието, не влегоа во салата за да обезбедат работен кворум.