Американскиот претседател Доналд Трамп денеска за „Фокс њуз“ изјави дека договорите за нормализирање на односите на Израел со Обединетите Арапски Емирати и Бахреин, кои наскоро ќе бидат потпишани во Белата куќа, ќе изврши притисок врз Палестинците да дојдат на преговарачка маса или ќе бидат игнорирани.
Трамп најави дека наскоро ќе се приклучат и многу други земји.
„Ќе имате мир на Блискиот исток, без да бидете глупави и да пукате во сите и да убивате секого и да пролевате крв низ целиот песок“, рече Трамп.
Израелскиот министер за надворешни работи Габи Ашкенази му се заблагодари на Трамп за мировните напори и рече дека четири знамиња се веат над израелското Министерство за надворешни работи денес.
„Историски ден за Израел и целиот регион. Ви благодарам, претседателе Трамп, за вашата улога во создавањето нова реалност на Блискиот исток“, напиша Ашкенази на Твитер, кој не беше поканет да го потпише договорот во Белата куќа.
Израелскиот министер за одбрана Бени Ганц исто така ги пофали договорите за нормализација, но изрази загриженост за можните последици меѓу Палестинците и поради навестувањето за продажба на американски борбени авиони Ф-35 на Емиратите.
Одејќи во Белата куќа, премиерот на Израел, Бенјамин Нетанјаху, оцени дека ова е возбудлив и историски ден за Израел и посочи дека тој ќе склучи мир за мир, објавија израелските медиуми.