Продолжениот четиридневен празничен викенд за Велигден, го наполни Охрид, кој оддава слика како да сме сред главната туристичка сезона. Најбројни се домашните гости, но насекаде се присутни и странците.
Покрај од Скопје, гости има и од Битола, Прилеп, Тетово и други македонски градови. Традиционално, голем број дојдоа од регионот. Бугарија, Србија, Албанија, Црна Гора, но имама и од подалечните земји, како што се Холандија, Данска, Израел и Полска.
Задоволство од посетеноста, покрај хотелиерите и малите издавачи на станови, искажа и градоначалникот на Охрид, Никола Бакрачески.
– Се надевам дека и времето ќе не послужи и не очекуваат убави пролетни денови за празниците и дека Охрид овие дена ќе биде полн со гости и туристи. На оние кои се уште се мислат каде да одат за празниците, им упатувам срдечна покана да дојдат во Охрид и на традиционален начин и со почитување на сите религиозни обичаи да го прослават Велигден – препорачува Бакрачески.
Гостите почнаа да пристигнуваат уште од петокот попладне, но сепак најголемата фреквенција беше во текот на вчерашниот ден.
Покрај петокот, неработен ден, е понеделник, втор ден Велигден, така што се очекува навалица од гости, кои овде ќе минат еден продолжен четиридневен викенд, или мал одмор./МЕТА