Западен Балкан сè уште е една од зоните на интерес на Русија, изјави претседателот на Демократската партија на социјалистите (ДПС) Мило Ѓукановиќ, додавајќи дека заедничката акција со меѓународните партнери може да покаже решителност во спротивставувањето на ретроградните и опасни идеи.
Претседателот на Црна Гора изјави дека „живееме во време кога меѓународните односи и безбедносните политики се во највисока корелација во поновата историја“.
„Дури и кога мултилатерализмот претставува најдобар механизам за зачувување на мирот, зајакнување на демократијата, одбрана од климатски закани, енергетска криза, но и здравствени, егзистенцијални и финансиски несигурности, кои го загрижуваат целиот свет“, рече Ѓукановиќ.
Според него, ваквиот ангажман денес е обврска, ако се има предвид алармантната состојба кога станува збор за кампањата на пропаганда и лажни информации, која има за цел да ја направи реалноста бесмислена, а континуирано да ја доведува публиката во заблуда.
„Факт е дека сме сведоци на почетната фаза на воспоставување на нов светски поредок, во кој некои стари играчи се повторно активни и насилни, што гласно не предупредува дека повеќе не смееме да го толерираме порастот на ксенофобијата, национализмот и десничарските идеи“, смета Ѓукановиќ.
Тој рече дека Црна Гора е во фокусот на оние кои се уште не можат да се помират со црногорската независност, членството во НАТО, водечката улога во влезот во Европската унија (ЕУ) и кои сакаат да го попречат прозападниот курс на земјата.
„Ова е особено загрижувачко кога се знае дека Балканот сè уште е сцена на спротивставени геополитички интереси, чија последица е забавување на интеграцијата на нашите општества во нивната природна европска средина, поткопување на довербата и одложување на усвојувањето на европските вредности“, оцени Ѓукановиќ.