Белгискиот премиер Александар Де Кро во четвртокот предложи Европската унија да ја проучи можноста за забрана на некои израелски „екстремисти“ кои се залагаат за насилство врз Палестинците да влезат на нејзина територија.
Во говорот пред претставниците, фламанскиот либерален лидер потсети на насилството врз Палестинците на Западниот Брег и оцени дека „недејствувањето кон насилните екстремисти е неприфатливо“.
„Мислам дека нашата земја мора да постапи на таков начин што на оние кои вршат сериозни злосторства, како што е насилството на Западниот Брег, ќе им биде забранет влезот во нашата земја и во Европската унија“, додаде Де Кро.
Ваквите индивидуални санкции мора да можат да се применат на „министер кој повикува на употреба на нуклеарно оружје против населението кое е беспомошно и денес живее во нехумани услови“.
Тој мислеше на изјавата на израелскиот министер, ултранационалистот Амичај Елијаху, кој во интервју рече дека употребата на нуклеарна бомба во Газа, во војната со палестинскиот Хамас, е „една од можностите“. Разговорот крена бура, вклучително и во Израел, а Елијаху беше суспендиран од сите владини состаноци до понатамошно известување.
Од 7 октомври, кога Хамас започна напад без преседан на израелска територија, најмалку 1.400 луѓе загинаа во Израел, соопштија властите. Повеќе од 10.000 Палестинци загинаа во воената реакција во Газа, објави Хамас.
Десетици илјади цивили избегаа на југ од опколената палестинска територија поради континуираното израелско бомбардирање на Газа.
Белгија, Франција и Шпанија се меѓу осумте земји на ЕУ (од 27) кои побараа хуманитарно примирје во таа војна на 27 октомври, во необврзувачка резолуција усвоена од Генералното собрание на ОН во Њујорк.
Александар Де Кро во четвртокот во белгискиот парламент повика да „седне на маса и да преговара за мир“.
„Не видов дека некоја терористичка организација исчезнала благодарение на повиците за насилство врз нив, терористичка организација ќе исчезне кога веќе нема никаква причина за нејзиното постоење, кога има преговори“, посочи тој.
Војната меѓу Израел и Хамас ќе биде главна тема на состанокот на министрите за надворешни работи на ЕУ в понеделник во Брисел.