Малку позната патриотска група која ги поддржува вдовиците на руските војници го повика претседателот Владимир Путин да нареди широка мобилизација на милиони мажи и да ги затвори границите за да обезбеди победа во Украина.
Путин, 70-годишниот лидер на Русија, е под силен притисок да победи во Украина повеќе од 10 месеци откако испрати војници како дел од операцијата за која вели дека имала за цел да ги одбрани Русите во источна Украина.
„Го молиме нашиот претседател Владимир Владимирович Путин да и дозволи на руската армија да изврши голема мобилизација“, објави групата „Вдовици на руски војници“ во објава на Телеграм, а пренесува порталот „Fxempire“.
„Бараме од нашиот претседател, нашиот врховен командант, да забрани заминување на воено способни мажи од Русија. И ние го имаме секое морално право на ова: нашите сопрузи загинаа штитејќи ги овие мажи, но кој ќе не заштити ако избегаат?“
Откако на 21 септември нареди, како што рече, „делумна мобилизација“, прва во Русија по Втората светска војна, беа повикани уште околу 300.000 мажи, иако уште неколку стотици илјади Руси побегнаа во странство за да избегнат да бидат регрутирани.
Кремљ не одговори веднаш на барањето на групата вдовици за коментар по жалбата. Путин минатиот месец изјави дека нема потреба од дополнителна мобилизација.
Претставник на групата на вдовици изјавил за Ројтерс дека сите способни руски мажи треба да се мобилизираат да ја бранат татковината.
„Војната што доаѓа ќе бара сосема различни ресурси: човечки, психолошки, економски“, изјавила таа за Ројтерс. „Заштитата на татковината е должност“.
Геополитичка пресметка
Путин со месеци ја гледа војната како дел од многу поширока историска борба меѓу Русија и Западот, за која шефот на Кремљ вели дека сака да ја подели и уништи Русија.
Западните сили негираат дека имаат за цел да ја уништат Русија.
Во мрачната новогодишна порака Путин порача дека одбраната на татковината е должност на сите Руси и вети победа во Украина.
-Групата вдовици почна да работи пред околу два месеци за да им помогне на сопругите на војниците убиени во Украина и има контакти со администрацијата на Кремљ, рекла претставничката.
-Ние сме во постојан контакт со претседателската администрација и, доколку е потребно, им испраќаме барања за да ја добиеме оваа или онаа поддршка, додала таа.
Цитирајќи го советскиот лидер Јосиф Сталин, групата соопштила дека сега е време за тешки мерки за одбрана од злите сили што се собираат околу границите на Русија.
-Денес, целото светско зло се обедини против Русија – целиот западен свет се сврте против нас, велат од групата. „Или ние или тие, нема друг избор“.