Очекуваме владиката Петар да ја запознае јавноста со деталите за влезот во медиумскиот бизнис, изјави денеска директорот на Комисијата за односи со верски заедници и религиозни групи, Даријан Сотировски за најавеното отворање на црковна телевизија.
Сепак тој рече дека нема став во однос на користењето на права коишто се со закон гарантирани во државата.
-Тоа е достапна можност. Во овој момент немаме детали каков концепт е запазен. Доколку правото се искористи онака како што е предвидено во нашата правна рамка, е за поздрав, но треба да видиме, рече Сотировски во изјава за медиумите.
Владиката и митрополит преспанско-пелагониски Петар добил дозвола за отворање телевизија. Одлуката е објавена на веб-страницата на АВМУ и истата се однесува на скопскиот регион, со времетраење од девет години. Телевизијата добила дозвола за општ, претежно забавен формат, каков што имаат најголемиот дел од телевизиските станици и медиуми во државата.
Владиката досега се нема јавно огласено во однос на отворањето на телевизијата.