Докторот Жан Митрев, сопственик на истоимената клиника, доставил гаранција од еден милион евра дека нема да избега во рамки на истрагата што се води против него за кривичното дело измама.
– Првпат информираме дека осомничениот во Судот депонирал 1 милион евра, како гаранција дека нема да ја напушти државата за време на целата постапка. Тоа се случи на првото сослушување на д-р Митрев, кога беше предложено да му бидат одземени патните исправи. А и тогаш го најавив следново – како што ќе се одвива постапката, така и ќе се бараат повеќе гаранции – рече Бубевски.
Случајот е во истражна постапка. Гаранцијата е единствено нешто што можеше да ни го открие Бубевски, поврзано со истрагата, во која досега се испрашани околу 80 отсто од сведоците. Тој очекува за 2-3 месеци да биде оформено обвинението против Митрев.
Против докторот во август беше отворена истрага за делото измама откако претходно ИРЛ го објави документарецот „Нечиста крв“ за лекувањето ковид-пациенти со методот хемофилтрација.