Норвешките археолози се надеваат дека овој месец ќе го завршат ископувањето на редок, закопан долг брод во Гилестад, древно археолошко наоѓалиште југоисточно од Осло.
Тоа е прво вакво ископување во Норвешка во последните 100 години.
Поголемиот дел од бродот е изгниен низ вековите, но археологот д-р Кнут Пасха од Норвешкиот институт за истражување на културното наследство, верува дека распоредот на железни клинци сепак ќе овозможи изработка на реплика. Бродот бил долг околу 19 метри и широк пет метри, што го сместува на исто ниво со добро сочуваните викиншки бродови „Осеберг“ и „Гокштад“ кои се изложени во норвешкиот главен град Осло. Овие бродови биле пронајдени на западната страна на широкиот фјорд Осло.
Викинзите тогаш обично пловеле кон британските острови, па го напаѓале и колонизирале крајбрежјето, за што сведочат археолошките остатоци, како и нордиските зборови и имиња на Островот денес. Нордиските Викинзи исто така стигнале и на Исланд, Гренланд, па и Њу Фаундленд и во Северна Америка.
– Воениот брод пронајден во Ѓелестад потекнува од времето меѓу 750 и 850 година, изјави д-р Пасха за Би-би-си.
Тој вели дека првичните сознанија говорат дека е многу поразличен од другите бродови, а „тоа е навистина возбудливо“, како што нагласи археологот. Се претпоставува оти во него, можеби бил закопан крал.