Задолжително носење заштитна маска и држење социјална достанца, како и мерење телесна температура на влез во судската зграда, дезинфекција и проветрување на судниците, предвидува Протоколот за спроведување мерки за заштита од Ковид-19 во судовите, што денеска го промовираше Здружението на судии.
Според претседателот на здружението на судии Џемали Саити нема услови судовите да спроведат онлајн судења за време на пандемијата.
– Судовите не располагаат со техничка опрема за спроведување на судења со употреба на интернет технологијата, изјави Саити.
Тој денеска во граѓанскиот и Кривичниот суд ги промовираше мерките за заштита од коронавирусот.
Услови за спроведување на судењата во Основниот граѓански суд засега има, смета судијката од Основниот граѓански суд Емилија Шопар Јованова.
– Засега немало проблем. Судницата е доволно голема да присуствува и странката и јавноста, изјави Емилија Шопар.
Изработени се 10 илјади флаери и 900 постери кои ќе бидат распределени низ сите судови во државата.