Тренерот на Милан, Стефано Пиоли ги повика своите играчи брзо да ги кренат главите и да победат против Аталанта. Двата тима во недела се соочуваат на „Сан Сиро“ во првенствен натпревар по двата последователни порази – од Монца (2:4) во Серија „А“ и од Рен (2:3) во Лига Европа.
„Утре е многу важно за пласманот, бидејќи треба да се вратиме на победите во првенството. Важно е да победиме бидејќи екипите зад нас продолжуваат да собираат бодови“, изјави тренерот.
Пиоли потоа коментираше за лошата дефанзивна игра во последно време: „Прашањето не е дали одбранбените линии се поблиску или подалеку една од друга. Прашањето е со каков интензитет притискаме. Што друго да правам? Исклучувајќи го поразот од Монца, во претходните девет натпревари не дозволивме повеќе од три шута кон противникот. Имам се што е потребно за да го направиме нашиот тим избалансиран и да победи“.
Аталанта е меѓу најсилните тимови во последно време, а ѕвезда таму е Шарл де Кетелар, кој е во тимот како трансфер право од Милан, каде не успеа да импресионира.
„Гасперини (тренер на Аталанта) врши извонредна работа и мораме да му честитаме. На многу фудбалери, како Де Кетелар, им е потребна сезона за да почнат да го развиваат својот потенцијал. Но, мислам дека Аталанта не е силна само во контра напади. Треба да бидеме агресивни и компактни при движењето на теренот. Треба да го повредиме противникот со многу голови. Гвардиола веќе кажа: Кога ќе се соочите со Аталанта, тоа е како да одите на забар – досадно е“, истакна Пиоли.
Инаку, Милан успеа да го елиминира Рен и ќе игра во осминафиналето во Лига Европа. Ждрепката се разви така што опциите за ривал на Италијанците се спуштија на Баер (Леверкузен) и Славија (Прага). На крајот судбината одлучи дека тоа е тимот од Чешка, со кој „росонерите“ се спасија од пресметка со солидниот состав на Чаби Алонсо.
„Не чувствував ништо посебно за време на ждрепката бидејќи не бев премногу загрижен поради фактот дека може да загубиме од Леверкузен. Се зависи од нас. Но и Славија не е лесен противник бидејќи ја доби својата група во која беше и Рома. Во Чешка се борат за титулата“, заврши тој.