Американскиот министер за финансии Џенет Јелен најави дека ќе изврши притисок врз мултилатералните развојни банки да ги насочат средствата кон земјите погодени од прехранбената несигурност, предизвикана од војната во Украина.
Во говорот подготвен за денешното обраќање пред членовите на Комитетот за финансиски услуги на Претставничкиот дом, Јелен рече дека ќе побара од институциите, вклучително и Светската банка и Африканската банка за развој, да ги прошират алатките за решавање на безбедноста на храната, „вклучувајќи долгорочни инвестиции во земјоделската продуктивност и земјоделската инфраструктура, пренесе „Ројтерс“.
Според неа, меѓународните финансиски институции, вклучително и Меѓународниот монетарен фонд, ќе играат клучна улога во решавањето на проблемот со прелевањето на ефекти од украинскиот конфликт, кои ја зголемуваат економската ранливост на многу земји погодени од пандемијата на Ковид-19.