Ерменските сепаратисти од Нагорно Карабах најавија дека во среда ќе го положат оружјето како дел од прекинот на огнот и дека преговорите за реинтеграција на спорниот регион во Азербејџан ќе започнат во четврток.
„Постигнат е договор за повлекување на преостанатите единици и војници на вооружените сили на Ерменија… и за распуштање и целосно разоружување на вооружените формации на одбранбената армија на Нагорно-Карабах“, соопшти раководството на сепаратистите, најавувајќи го почетокот на преговорите за „реинтеграција“ на териториите во Азербејџан во четврток во азербејџанскиот град Џевлах.
Министерството за одбрана на Азербејџан во средата потврди дека постигнало договор за прекин на огнот со етничките ерменски сили во планинскиот регион Нагорно-Карабах населен со етнички Ерменци.
Министерството објави дека ерменските сили во Карабах се согласиле „да го остават оружјето, да ги напуштат борбените и воените позиции и целосно да се разоружаат“ и да го предадат целото оружје и тешка опрема на азербејџанската армија.