Членките на Светската здравствена организација (СЗО) би можеле да го пропуштат мајскиот рок за потпишување правно обврзувачки договор за борба против пандемии, а тоа би било голем удар за идните генерации, најави шефот на СЗО.
Новиот договор и серијата ажурирања на постоечките правила за управување со пандемијата имаат за цел да ја зајакнат одбраната на светот против новите патогени, откако пандемијата на ковид-19 уби повеќе од 7 милиони луѓе ширум светот.
„Морам да кажам дека сум загрижен што земјите-членки нема да ја исполнат оваа обврска, и има уште голем број главни прашања кои мора да се решат“, рече генералниот секретар на СЗО, Тедрос Аданом Гебрејесус во обраќањето пред извршниот одбор на организацијата во Женева.
„Според мене, неуспехот да се постигне договор за пандемија и измените на IHR (Меѓународните здравствени регулативи) ќе бидат пропуштена шанса за која идните генерации можеби нема да ни простат“, предупреди Тедрос, повикувајќи ги земјите да ја искористат можноста да ја обликуваат иднината на СЗО и глобалното здравје.
СЗО успеа да постигне таков договор само еднаш во својата долга 75-годишна историја, а тоа беше договорот за контрола на тутунските производи од 2003 година.