Министерот за внатрешни работи Панче Тошковски и дополнителниот заменик министер Митко Бојмацалиев денеска остварија работна средба со амбасадорот на Република Словенија, Грегор Пескор.
На средбата Тошковски се заблагодари за продуктивната соработка со амбасадата и министерството за внатрешни работи на Република Словенија, особено за време на миграциската криза, како и големата поддршка дадена во тој период. Во таа насока, министерот изрази уверување дека истата ќе продолжи и во иднина.
Министерот Тошковски накратко го запозна амбасадорот Пескор за функционирањето на министерството за внатрешни работи во техничката Влада, кое има голема одговорност во спроведувањето на изборите кои ни претстојат, како гарант дека истите ќе бидат фер и демократски.
Тошковски ги образложи преземените мерки со цел ублажување на процедурите за вадење на лични документи со цел граѓаните да можат на еден достоинствен начин да дојдат до својот личен документ. Во таа насока укажа и дека сме обврзани на почитување на човековите права во однос на слободното движење на граѓаните.
На средбата, амбасадорот Пескор ја потенцираше досегашната поддршка дадена на МВР од страна на Република Словенија, особено за миграциската криза на билатерално ниво и сега во рамки на Фронтекс, но и онаа за воздухопловните единици.
Бојмацалиев се заблагодари за досегашната соработка со Република Словенија и изрази желба за нејзино продлабочување.