Врховниот воен командант на Украина, генерал Валериј Залужни, изјави дека војната со Русија преминува во нова фаза на статични и исцрпувачки борби, што, предупреди, може да биде од корист за Москва и да ѝ овозможи да ја обнови својата воена моќ.
Во интервју за „Економист“, пренесено од „Ал Џезира“, Залужни навел дека на украинската армија ѝ се потребни клучни нови воени капацитети и технологија, од кои најважно е воздушното воено засилување за да излезе од новата фаза на војната, која влезе во 21-от месец.
Интервјуто што го даде за списанието беше објавено по речиси пет месеци од големата украинска контраофанзива, со која украинската армија не успеа да направи значителен пробив кон густо минираните руски одбранбени линии или да го постигне очекуваното забавување на борбите пред зимата.
Со оглед на тоа што руските трупи се во офанзива во делови од источниот дел на земјата, Киев стравува дека Москва планира да започне кампања со воздушни напади за да ја онеспособи електричната мрежа, оставајќи милиони жители во темнина и без греење среде зима.
Залужни смета дека Украина мора поефикасно да ја уништи руската артилерија и да осмисли подобра технологија за пробивање на руските мински одбранбени линии, пренесе „Хина“.