Најмалку 87 милијарди евра – толку пари ќе загуби Германија, ако Грците не си ги вратат долговите. Но Германците не се најголемите губитници во оваа игра , констатира Дојче Веле .
Дури и самиот министер за финансии на Грција не верува дека германските даночни обврзници некогаш ќе ги видат пари.”Германците ни доделија многу пари, но тие се изгубени – потонаа во црна дупка”, изјави Јанис Варуфакис во интервју за германскиот “Тагесшпигел”. Останува да видиме колку пари се потонати тука во оваа црна дупка и што ќе ги чини оваа авантура германските даночни обврзници.
Кој губи најмногу?
Грчкиот министер за финансии Јанис Варуфакис не им остава голема надеж на германските граѓани дека повторно ќе ги видат своите милијарди позајмени на кризната земја. За колку пари се работи?
Во секој случај, германските банки речиси целосно ги повлекоа своите ангажмани од Грција. Навистина, тие таму, според состојбата од септември 2014 година, „во оган“ имаат вкупно 23,5 милијарди евра. Но, од тоа само околу 4,6 милијарди евра отпаѓаат на банки и 3,6 милијарди евра на претпријатија и приватни лица. Најголемиот дел, околу 15,2 милијарди евра се побарувања кон јавните буџети, кои речиси исклучиво се однесуваат на германската државна банка КфВ. Притоа, станува збор за кредитите на КфВ од првиот пакет финансиска помош за Грција, за кои германската држава гарантира во целосен износ.
Германските банки речиси незасегнати
Дојче банк, според сопствени наводи, во Грција била ангажирана со околу 300 милиони евра, а Комерцбанк со 400 милиони. Според аналитичка студија на ЏиПи Морган, германските банки, покрај француските, се најголеми доверители. Но, експертите сепак го укинуваат сигналот за тревога: при излез на Грција од еврозоната (грексит), последиците по финансиските институции, со оглед на ниските суми, ќе бидат ограничени, пишува на пример аналитичарот Кијан Абухусеин. „Главниот ризик и натаму останува опасноста од ’зараза’ за државите на периферијата“, вели тој, што важи посебно за Италија.
За германската држава постои опасност да не бидат вратени парите платени во рамките на пакетот за помош. Минхенскиот Ифо институт максималниот ризик за загуби на Германија го проценува на 87 милијарди евра, состојба во март, во случај на државен банкрот на Грција и истовремен излез на земјата од еврозоната. Во оваа сума, меѓу другото, се и веќе споменатите 15,2 милијарди евра кредити од КфВ.
„И вака и така, парите ги нема“
„Овие пари, што се во ’оган’, краткорочно нема да ги добиеме во никој случај, а во најдобар случај, можеби долгорочно,“, рече за Дојчландфунк Томас Штраубхар, професор по меѓународни економски односи на Универзитетот Хамбург, уште во јануари. Грција и така и така нема да може да ги врати своите долгови, сеедно дали земјата ќе остане во еврозоната или ќе истапи од неа. „Трошоците за Германија се гигантски“, истакна тој.
Сепак, ако сумите се стават во корелација со вкупниот брутопроизвод на земјата, Германија и покрај апсолутните бројки на гарантните ризици, не спаѓа во најголемите губитници. Економската институција Блумберг направи анализа на грчките долгови кон земјите во еврозоната во однос на нивната економска продуктивност. Според овие пресметки, Словенија, Малта, Шпанија, Италија и Естонија би загубиле околу 2,8 проценти од својот брутодомашен производ, а Германија и Франција се наоѓаат во средината на листата, на седмо и осмо место. Германија, во случај да ги загуби парите дадени на Грција, би била погодена со максимално 2,37 проценти од БДП, пресметаа аналитичарите од Блумберг.