На повеќе локации во Скопје осамнаа „сообраќајни знаци“ како реакција на предлогот Закон за игри на среќа со кој се предвидува дислокација на обложувалниците и казината на најмалку 500 метри од образовните установи.
Поставени се знаци на кои е прикажано на колкаво растојание има училиште, а на колкаво казино.
Од Владата неодамна информираа дека предлог Законот е со цел заштита на младата популација, бидејќи со постојниот закон не е утврдена оддалеченоста на деловните простории во кои се приредуваат игрите на среќа од основните и средните училишта, односно не го утврдува ваквиот критериум.
Од Асоцијацијата на спортски обложувалници АСОМ потенцираа дека со ова ќе им се укине работата на 10 илјади, а посредно на 54 илјади луѓе, буџетот годишно ќе остане покус за стотици милиони евра, а ќе се поттикне и нелегалното коцкање.
Предлог законот го помина владиниот филтер и моментално се наоѓа во Собрание.