Киев ја обвини Будимпешта дека го блокира нејзиниот пристап до украинските воени затвореници кои Русија и ги предаде на Унгарија по интервенцијата на Руската православна црква, без знаење на украинските власти.
„Сите обиди на украинските дипломати во изминатите неколку дена да воспостават контакти со овие украински граѓани се покажаа неуспешни“, напиша на Фејсбук портпаролот на украинската дипломатија Олег Николенко.
Предадени на Унгарија на 8 јуни, тие единаесет украински државјани со унгарско потекло „практично се во изолација, немаат отворен пристап до информациите, а нивната комуникација со нивните роднини се случува во присуство на трети лица“, продолжи Николенко. „Таквото однесување на Будимпешта може да се оквалификува како кршење на Европската конвенција за човекови права#, нагласи тој.
Николенко рече дека Киев „уште еднаш бара“ од унгарската влада да му дозволи пристап на украинскиот конзул до овие воени заробеници за да може „да се утврди нивната физичка и психолошка состојба, да бидат информирани за нивните права и да им се даде итна конзуларна помош“.
Уапсената група потекнува од Транскарпатија, регион на југозападот на Украина каде што живее значајна унгарска заедница. Нивното префрлање во Унгарија го најави Руската православна црква, која дејствуваше како посредник. Украина изрази жалење што не е вклучена во преговарачкиот процес.
Унгарскиот премиер Виктор Орбан одржува контакт со Кремљ и покрај агресијата врз Украина, а во последните години воспостави врски и со Руската православна црква, пишува агенцијата Франс прес. Токму благодарение на неговата поддршка, рускиот патријарх Кирил, лојален поддржувач на рускиот претседател Владимир Путин, ги избегна санкциите на Европската унија минатата година.