Турскиот претседател Реџеп Таип Ердоган, во новогодишната порака ја повика светската заедница да стави крај на убивањето на беспомошните жени и деца во Газа, јави Анадолија.
Во новогодишната порака турскиот претседател Ердоган се осврна на целите на неговата земја, како и на глобалните случувања кои ја одбележаа годината во заминување.
Ердоган подвлече дека мора да се видат искрени напори за запирање на судирите во светот.
– Мораме да видиме искрени напори за запирање на судирите кои на луѓето им создаваат болка и ги трошат ресурсите на нациите, почнувајќи од руско-украинската војна, рече Ердоган и додаде: „Мораме да видиме дека сите земји, институции, заземаат единствен став против убивањето на недолжни деца и жени во Газа“.
Претседателот на Турција додаде дека има надеж за подобра иднина на човештвото.
– Таканаречените демократски земји кои ја сакаат слободата мораат да престанат да ги поддржуваат крвавите терористи за тоа да се случи, рече Ердоган.
Тој зборуваше и за проблемите со кои се соочува неговата земја.
– Основа на причината на проблемите со кои се соочуваме, од борбата против тероризмот до економските стапици, е да се спречи изградбата на голема и моќна Турција, рече Ердоган.
Турскиот претседател нагласи дека во време кога глобалната криза продолжува да се зголемува, „уште повеќе ќе ја издигнат ѕвездата на Турција, која произведува, вработува, расте и се развива“.
– Нашите цели за 2023 година беа само почеток. Со „Столетието на Турција“ го започнуваме нашиот вистински пробив во 2024 година, порача Ердоган.