Ќерката на претседателот на САД, Иванка Трамп, и нејзиниот сопруг Џеред Кушнер заработиле најмалку 82 милиони долари од дополнителни приходи во првата година откако работат како неплатени советници на Доналд Трамп, покажуваат нивните имотни листови.
Ќерката и зетот на претседателот Трамп продолжија со масовно инвестирање во трговски зделки и недвижнини и откако Трамп дојде на претседателската функција.
Иванка Трамп наводно заработила 3,9 милиони долари од нејзиниот влог во Trump International Hotel и над 5 милиони евра од нејзиниот личен бренд.
Овие заработки разгореа сомнеж дали се етички издржани и дали има конфликт на интереси.
Белата куќа ги објави имотните листови доцна вчера, додека претседателот Трамп беше на пат кон историскиот самит со севернокорејскиот лидер Ким Џонг Ун во Сингапур.
Иванка и Џеред се повлекоа од раководните функции во разни компании што ги поседуваат за да бидат советници во тимот на претседателот.
Меѓутоа, и двајцата ги задржаа нивните значително високи влогови во неколку компании, Кушнер во недвижнини, а Трамп во нејзиниот бренд за облека и модни додатоци.
Иванка Трамп исто така пријавила заработка од 2 милиони долари од Trump Organisation и аванс од 289.000 долари за нејзината книга „Women Who Work“. Кушнер пријавил приход од над 5 милиони долари од станбен комплекс во Њу Џерси.
Тешко е да се прецизира колку милиони тежи двојката високи советници во Белата куќа, бидејќи формуларите за транспарентност што ги поднесуваат се многу општи.
Адвокатот на двојката за етички прашања рече дека Кушнер и Трамп постапиле согласно владините правила за етичко работење, откажувајќи се од раководните функции во компаниите што ги поседуваат, а за работата во Белата куќа не добиваат хонорар.