Пожарната служба во Париз објави дека главната структура на катедралата Нотр Дам e спасена, обjaвија француските медиуми.
Со часови пожарникарите се бореа да го стават под контрола пожарот што избувна во катедралата вчера вечер.
“Веќе сметаме дека основната структура на” Нотр Дам “е спасена и ќе биде зачувана”, рече шефот на операцијата Жан-Клод Гален само еден час откако беше објавил дека не може да даде гаранции за катедралата.
Според Гален нема опасност двете кули на “Нотр Дам” да се срушат. Малку пред тоа прогнозите беа стравични бидејќи се урна кулата стрела која се издигнуваше над централниот дел на градбата на познатата црква.
Засега не е позната причината за пожарот, но се претпоставува дека е можно да е поврзано со реновирањето на катедралата.
За 20 часот беше најавена редовна прес-конференција на претседателот Емануел Макрон, но поради пожарот во ова готско здание тој го откажа обраќањето.
На Твитер се огласи и американскиот претседател Доналд Трамп, кој предложи за гаснењето на пожарот да се искористат „летечки водени танкери“.
Околу 13 милиони посетители и верници ја посетуваат црквата годишно, или во просек околу 30.000 дневно. Во најфреквентните денови, над 50.000 луѓе дневно влегуваат во катедралата. Таа е катедралата на Париз и седиштето на архиепископот на градот. Богородичната црква се смета за најубавиот пример за француската готска архитектура.
Богородичната црква или Нотр Дам е готска катедрала на источната половина на островот Сите на реката Сена во Париз. Името „Нотр Дам“ на француски значи „Нашата Госпоѓа“ (Богородица или Дева Марија). Ова е една од најубавите готски катедрали во светот, градена низ целиот готски период. Скулптурите и витражите се одликуваат со големо влијание од натурализмот, за разлика од претходната романска архитектура.
Минатата година, Католичката црква во Франција упати итно барање за финансиски средства за спасување на катедралата, која почна да се урива.
Пожарот се случува на една недела пред католичкиот Велигден.
Макрон од блиску го следеше гаснењето на пожарот.
Notre-Dame de Paris en proie aux flammes. Émotion de toute une nation. Pensée pour tous les catholiques et pour tous les Français. Comme tous nos compatriotes, je suis triste ce soir de voir brûler cette part de nous.
— Emmanuel Macron (@EmmanuelMacron) April 15, 2019
Ректорот на Нотр Дам, Патрик Жаквин, за локалните медиуми рече дека и Круната од трње и Туниката на свети Луј се зачувани.
Меѓутоа, останува стравот за многуте бесценети уметнички дела и артефакти што сè уште се наоѓаат во катедралата.